Qonaqların sizə ehtiyacı olacağı anlar üçün hazır olun

Vaxtında və aydın ünsiyyət beşulduzlu ev sahibliyinin açarıdır. Qonaqlar faydalı təlimatlar və sürətli cavablar almağın çox vacib olduğunu deyir. "Yaxşı ünsiyyət qonaqların qayğı hiss etmələrinə kömək edir və bu da ev sahibliyinin təməlidir", - Nyu-Meksiko ştatının Santa-Fe şəhərindən olan Super Ev Sahibi Sedi deyir.

Qonaqların ehtiyacları olan məlumatları ehtiyac duyduqları zaman təmin etməyə çalışın.

İnsanlar səyahət edərkən bir çox şeyi balanslaşdırmağa çalışır. Qonaqları lazımsız təfərrüatlarla yormadan düzgün zamanda faydalı məlumatlar təmin etməyi hədəfləyin.

• Planlaşdırılmış mesajlardan istifadə edin. Bunlar qonaqlar istədikdə müəyyən təfərrüatları paylaşmağınıza imkan verir. Məsələn, bir çox Ev Sahibləri girişdən bir gün əvvəl göndəriləcək planlaşdırılmış salamlama mesajına məkanının yol istiqamətlərini əlavə edir.

• Hərtərəfli ev təlimat kitabçası yazın. Vacib şeyləri harada tapmaqla bağlı aydın məlumatlar, eləcə də cihazlar və qurğuların istifadəsinə dair addım-addım göstərişlər daxil edin.

• Faydalı məlumatları bir neçə yerdə yerləşdirin. Termostatın və açıq hava qrilinin istismar təlimatlarını həm bu alətlərin yaxınlığında yerləşdirə, həm də ev təlimat kitabçanızda təkrarlaya bilərsiniz. Qonaqlar ehtiyacları olan təfərrüatları axtarmaq məcburiyyətində qalmadan tapa bilməlidir.

Qonaqlar xüsusilə giriş günündə və ya bir problem yaranarsa, tez cavab verməyinizi gözləyir. Qonaqlama zamanı ortaya çıxan və təcili olmayan suallara 12 saat ərzində cavab vermək məqsədəuyğundur. İçəri girmək üçün açarı tapa bilməmək kimi təcili hallarda bir saat ərzində cavab verməlisiniz.

• Bildirişlər qurun. Qonaqların mesajlarından xəbərdar olmaq üçün Airbnb tətbiqindən istifadə edin. Tətbiqdə və cihazınızın parametrlərində mobil bildirişləri aktivləşdirin, səsi aktiv edərək cihazınızı əlinizin altında saxlayın və qonaqlamalar zamanı vaxtaşırı olaraq mesajlarınızı yoxlayın.

• Ehtiyat planınız olsun. Əlçatan olmadığınız zaman yardım edəcək bir şəxs təşkil edin. Ortaq Ev Sahibi və ya digər dəstək nümayəndəsi tutun və əlaqə məlumatlarını qonaqlarla paylaşın.

• Cəld cavablardan istifadə edin. Bunlar müəyyən suallara öncədən cavab yazaraq daha sürətli cavab verməyinizə imkan verir. Məsələn, qonaqlar yerli tövsiyələr istədikdə göndərmək üçün yaxınlıqdakı sevimli restoranlarınızın siyahısının daxil olduğu bir cəld cavab hazırlaya bilərsiniz.

Xüsusilə də işlər planlaşdırıldığı kimi getmədikdə hər bir vəziyyətə qonağın gözü ilə baxmağa çalışın.

• Sakit olun. Gözlənilməz problemlər hər kəs üçün çətin ola bilər. Bir neçə dəfə dərindən nəfəs alın və diqqətinizi qarşılaşdığınız problemi həll etməyə yönəldin.
• Şəffaf olun. Qonaqlara istəklərini aldığınızı və üzərində çalışdığınızı bildirin. Nə zaman bir həll yolu tapacağınızı və onları necə məlumatlandıracağınızı izah edin.
• Empatiya ilə cavab verin. Özünüzü qonaqlarınızın yerinə qoyun. İnsan evindən kənarda olduqda kiçik problemlər belə olduğundan böyük görünə bilər.

Bu məqalədəki məlumatlar dərc edildikdən sonra dəyişmiş ola bilər.