Elan fotolarınızın keyfiyyətini artırın

Fotoşəkillərin qonaqların qalmağa yer seçərkən nəzərə aldığı əsas həlledici amillərdən biri olduğunu bilirdiniz? Fotolarınızın keyfiyyəti potensial qonaqların elanınızı axtarış nəticələrində nə qədər tez-tez tapmasına da təsir edə bilər. Bu da yüksək keyfiyyətli fotoların ev sahibliyi biznesiniz üçün çox önəmli olduğunu göstərir.

Cef və Kandida Coşua-Tri, Kaliforniyadakı səhra evləri El-Rançoya daha çox bron cəlb etmək üçün öz yaradıcılıq qabiliyyətlərindən istifadə edən peşəkar fotoqraflar və Super Ev Sahibləridir. Onların sirri məkanın həm fotolarda, həm də şəxsən gözəl görünməsidir.

Burada cütlük elan fotolarınızı təkmilləşdirmək üçün ekspert ipuclarını paylaşır.

Məkanınızın fotolarını çəkərkən onu səliqəyə saldığınıza əmin olun. "Nə qədər çox insanın foto çəkməzdən əvvəl məkanlarını təsadüfi əşyalardan təmizləməyi unutduğunu görmək bəzən bizi təəccübləndirir", - Cef deyir. "Yaşayış məkanlarımızı artıq dağınıqlıqlardan təmiz saxlamağa çalışırıq. Beləliklə, istədiyimiz fotonu diqqəti yayındıran şeylər olmadan çəkmək daha asan olur".

Lakin bu, o demək deyil ki, məkanınız tamamilə boş olmalıdır. "Kadra insan komponenti əlavə edin", - Kandida deyir. Məsələn, ədyal və ya kiçik kitab yığını. "Bu, məkanı daha da xoşagələn edir".

Məkanınızın əsas təsviri səyahətçilərin axtarış nəticələrində və elan səhifənizdə kəşf etdiyi ilk şeydir. Odur ki, pozitiv ilk təəssürat yaratmağa çalışın.

"Məkanınızın başqalarından nə ilə fərqləndiyini düşünün. Onu xüsusi edən nədir? Sizcə, insanlar özlərini orada görə biləcək? İlham almaq və nələrin işə yaradığını tapmaq üçün digər Airbnb elanlarını araşdırın", - Kandida tövsiyə edir.

"Əla elan fotolarının sirri işıqdır", - Kandida deyir. Məkanınızı düzgün parıltı ilə çəkmək üçün bir neçə təklif:

• İşığa diqqət edin. Gün boyu evinizin içərisində və çölündə təbii işığın necə göründüyünü təcrübədən keçirin və araşdırın.
  
• Alaqaranlıqda və dan yeri ağardıqda fotolar çəkin. Açıq havada çəkərkən gün çıxdıqdan dərhal sonra və ya gün batmazdan əvvəl - qızıl saatlarda - çəkin. Həmin vaxt işıq daha yumşaq olur və birbaşa düşmür. Bu isə məkanınıza xoş və səmimi bir ton verəcək.
  
• Təbii işığı tərcih edin. Qapalı məkanlarda fotolar çəkirsinizsə, məkanınıza günün hansı vaxtında ən çox birbaşa, təbii işıq düşdüyünü tapın. Fotolarda çox sərt göründüyü üçün süni işıq hər zaman son çarə olmalıdır.
• Fləşi söndürün. Digər süni işıqlandırmalarda olduğu kimi, fləş də sərt effekt yarada bilər. Fotosunu çəkdiyiniz məkanda təbii işıq yoxdursa, lampa yandıraraq rahat bir hiss yaradın.

Foto keyfiyyətinə gəldikdə, kompozisiya - oriyentasiya, fotonun ölçüsü, tənzimləmə və simmetriya kimi faktorlar - fotonuzun mövzusu qədər vacibdir. Kompozisiyanızı hazırlayarkən nəzərə alınmalı bəzi ipucları:

• Fotolarınızı mərkəzləşdirin. Unutmayın ki, Airbnb elanınıza və axtarış nəticələrinə uyğun olmaq üçün fotoları kəsir. Əsas predmetinizi çərçivənin mərkəzində yerləşdirin ki, heç bir vacib element kəsilməsin. "Evinizdə sevdiyiniz xüsusi əşyalar varsa, onları fotolarda fərqləndirmək üçün mərkəzdə yerləşdirin", - Cef deyir.

• Göz səviyyəsində çəkin. Fotonuzu neytral bucaq altında (təhriflər və ya yuxarı-aşağı bucaqlar olmadan) çəkmək təsvirin yaxşı balanslaşdırılmasını təmin edir və qonaqların məkanı şəxsən təcrübədən keçirəcəyinə yaxın şəkildə görməsinə imkan verir.
• Üçüncülərin qaydasını tətbiq edin. "Çərçivənizi üç hissəyə bölsəniz, bu hissələrdən bələdçilər kimi istifadə edərək kompozisiyadakı elementləri təşkil edə bilərsiniz", - Cef deyir.
• Müxtəlif kadrlardan istifadə edin. Geniş fotolar insanların otağın ölçüsünü anlamasına yardım etmək üçün idealdır, orta planlı fotolar isə diqqəti TV və ya məşq velosipedi kimi xüsusi elementlərə yönəltmək üçün əla seçimdir. Təfərrüatlı kadrları isə məkanınızın fərdiliyini nümayiş etdirən kiçik xüsusiyyətlər üçün istifadə edin.
• Əlaqələr yaradın. Təsvir qalereyanıza bələdçili tur kimi yanaşın. Potensial qonaqlara fotolarda otaqların bir-biri ilə necə əlaqələndiyini göstərin.

Nəyin fotosunu çəkməyi, nəyi isə çəkməməyi müəyyən edərkən qonaq kimi düşünməyi sınayın.

Kandida deyir: "Öz hekayənizi ən yaxşı şəkildə əks etdirən bir neçə təsviri hazırlayıb seçmək vacibdir. "Qonaqlarınız məkanınızda nələri bəyənəcək?" Bilməli olduqları sürprizlər varmı? Təfərrüatları göstərərkən eyni zamanda otağın görünüşü haqqında necə bir ümumi fikir yarada bilərsiniz?"

Unutmayın ki, hekayənizi danışmağın bir hissəsi daha böyük mənzərəni göstərmək - ətraf ərazini təqdim etməkdir. "Bütün təsvirlər evinizlə bağlı olmalı deyil", - Cef qeyd edir. Məsələn, yaxınlıqdakı gəzinti cığırının və ya küncdəki sevimli qəhvə dükanınızın fotolarını əlavə edə bilərsiniz.

Hər şeydən əvvəl, məkan və məhəllənizi paylaşarkən potensial qonaqların gələcək qonaqlamanı təsəvvürlərində canlandırmasına yardım etmək üçün yüksək keyfiyyətli fotolardan istifadə edin. Ümid edirik ki, məkanınızı bron edəcək və unudulmaz bir qonaqlama yaşayacaqlar.

Bu məqalədəki məlumatlar dərc edildikdən sonra dəyişmiş ola bilər.