Əlçatanlıq ehtiyacları olan qonaqlara ev sahibliyi etmək üçün ipucları

Əlçatanlıq ehtiyacları olan qonaqlar bron etməzdən əvvəl bir yerin özlərinə nə qədər uyğun olduğunu bilmək istəyir. Onlar Airbnb axtarış nəticələrini pilləsiz giriş və əlillər üçün parkinq yeri kimi konkret xüsusiyyətlərə görə filtrləyə bilərlər.

Əlil arabasından istifadə edən qonaqlar üçün uyğun olduğu təsdiq edilmiş evlər Uyğunlaşdırılmış kateqoriyasında da seçilən cəhət kimi vurğulanır. Bu kateqoriyaya daxil edilməsi üçün yerinizdə bir girişin, ən azı bir yataq otağının və bir hamam otağının pilləsiz girişi olmalı və hamam otağında tutacaqlar və ya duş oturacağı kimi dəyişikliklər edilmiş olmalıdır.

Eviniz haqqında aydın və dəqiq məlumat təmin etmək çox vacibdir. Əlçatanlıq ehtiyacları olan qonaqların əminliklə bron edə biləcəyi cəlbedici məkan yaratmaq üçün bəzi ipuclarını burada təqdim edirik.

Məkanınızı fərqləndirə biləcək xüsusiyyətlər bunlardır:

• Əlillər üçün parkinq yeri
• Qonaq girişinə gedən işıqlandırılmış yol
• Qonaq girişinə pilləsiz giriş
• Otaqlara pilləsiz giriş
• 81 santimetrdən geniş girişlər
• Pilləsiz duş
• Tualet və/yaxud duş tutacaqları
• Duş və ya vanna stulu
• Tavan qaldırıcısı və ya mobil qaldırıcı
• Üzgüçülük hovuzu və ya cakuzi qaldırıcısı

Bütün əlçatanlıq xüsusiyyətləri elanınızda dərc edilməzdən əvvəl Airbnb-nin əlçatanlıq təlimatlarına əsasən nəzərdən keçirilir. Bir xüsusiyyət təlimatlara cavab vermirsə və ya fotoda aydın şəkildə göstərilmirsə, başqa bir foto yükləməyinizi və ya həmin xüsusiyyəti elanınızdan silməyinizi istəyə bilərik.

Hər bir otağın bir neçə fotosunu paylaşmaq qonaqlara evinizin onların ehtiyaclarına uyğun olub-olmadığını müəyyənləşdirməkdə kömək edir.

• Hər bir şəkil üçün təsviri altyazı yazın. Məsələn, hamam otağının fotosu üçün altyazıya bu məlumatlar əlavə edilə bilər: "Evdə pilləsiz girişi olan yeganə hamam otağı budur. Tualet və duşda sabit bərkidilmiş tutacaqlar var".

• Şəkilləri bir neçə rakursdan çəkin. Məsələn, hamam otağının fotolarında hər bir tutacağın mövqeyi və tualetə və duşa çatmaq üçün döşəmə boyunca uzanan geniş, düz yol göstərilə bilər.

Əlçatanlıq xüsusiyyətlərinin fotolarını çəkmək haqqında ətraflı məlumat

Qonaqlar sizə evinizin əlçatanlıq xüsusiyyətləri barədə sizə mesaj göndərdikdə onlarla ünsiyyət qurun. Sadəcə bir neçə sual soruşmaq və ya suala cavab vermək böyük fərq yarada bilər.

Söhbətə başlamaq üçün bəzi faydalı sual nümunələri:

• Evlə bağlı soruşmaq istədiyiniz konkret suallarınız var?
• Qonaqlamanızı daha rahat etmək üçün nə edə bilərəm?

Məkanınızda hərəkəti asanlaşdırmaq kimi ağlabatan qonaq sorğularını təmin etmək üçün əlinizdən gələni edin. Kiçik dəyişikliklərin qonaqlara xoş qarşılandıqlarını hiss etdirməyə kömək edə bilib-bilməyəcəyini düşünün. Bir neçə nümunə:

• Otaqlar və məkanlar arasında daha geniş yollar yaratmaq üçün mebellərin yerini dəyişin.
• Dəsmal və qab-qacaq kimi gündəlik məişət əşyalarını daha əlçatan yerlərə qoyun.
• Elektrik yuvalarının önündəki maneələri yığışdırın.

Unutmayın ki, əlçatanlıq ehtiyaclarının olub-olmamasından asılı olmayaraq, heç də bütün məkanlar hər qonağa uyğun olmur. Ancaq Ayrı-seçkilik Əleyhinə Siyasətimizdə qeyd edildiyi kimi, kiminsə əlilliyi olduğuna görə rezervasiyadan imtina edə bilməzsiniz. Həmçinin ev heyvanları hesab edilməyən xidmət heyvanları üçün ev heyvanı haqqı tuta bilməzsiniz.

Bələdçi kitabçanız yerli ipuclarını paylaşaraq qonaqpərvərliyinizi və şəhərinizi nümayiş etdirmək üçün bir fürsətdir. Restoranlar, görməli yerlər və açıq hava fəaliyyətləri ilə bağlı tövsiyələr əlavə edə bilərsiniz. 

Bələdçi kitabçanızı yaradarkən əlçatanlıq ehtiyacları olan səyahətçilərin ehtiyaclarını da düşünün. Məsələn, rampalı restoranları, asfaltlı gəzinti yollarını və əlçatan oturacaqları olan turistik yerləri qeyd edə bilərsiniz. İctimai nəqliyyat haqqında da məlumat paylaşa bilərsiniz.

Bu məqalədəki məlumatlar dərc edildikdən sonra dəyişmiş ola bilər.