Məkanınızı sosial media ulduzuna çevirmək

Sosial media aləmində hərəkət etmək meşədə itməyə bənzəyir. Haradan başlamaq lazımdır? Əla məzmunu necə yaratmaq olar? Bununla daha çox bronu necə əldə etmək olar? Vaşinqtonun Skaykomiş qəsəbəsində yerləşən Tye Haus-un Ev Sahibi Tom Feldman izləyici toplamaq və evinizi mütləq ziyarət edilməli yerə çevirmək üçün uğurlu (və insanı rahatladan) yanaşmasını paylaşır.

"Ev sahibliyi hekayəmiz 2012-ci ildə ilk A formalı evimiz "Tye Haus"-u aldığımız zaman başladı. Biz onu təmir etdik, Airbnb-də elanını yerləşdirdik və regiondan çəkilən filmə bənzər səhnələr - gəzintilərimiz, yerli görməli yerlər, buralarda sevdiyimiz şeylər - ilə birlikdə evimizin şəkillərini paylaşdığımız Instagram hesabını açdıq. Bundan qısa müddət sonra populyar fotoqraf Aleks Ştrol bizimlə əlaqə saxlayıb əməkdaşlıq etmək istədiyini dedi. Lentimizdə paylaşacağımız şəkillər müqabilində bir növ yaradıcı istirahət yeri olaraq ona iki ay ev sahibliyi etdik. Aleksin fotolarını paylaşmağa başladıqdan sonra populyarlığımız artdı. Bu, bir çox gələcək əməkdaşlıq və müsabiqələrin birincisi idi.

"İndi ailəm və mən üç A formalı kabinəni idarə edirik və dünyanın hər yerindən olan influenserlərə ev sahibliyi etməyə davam edirik. Yaratdıqları məzmunu lentimizdə paylaşmaq müqabilində onları araşdıracaqları, sərgüzəşt yaşayacaqları və dincələcəkləri yerlə təmin edirik. Bu, əsas marketinq texnikalarımızdan birinə çevrilib. Həftə içini, eləcə də durğun mövsüm aylarını dolduraraq doluluq göstəricimizi 30% -dən az qala 100% -ə qədər artırmışıq. Həmçinin təxminən 115 min nəfər onlayn izləyici toplamışıq. Evinizi sosial media xəritəsində yerləşdirmək haqqında ipuclarımızı təqdim edirik."

"Evinizi reklam etmək istiqamətində ilk addım - məkanınıza ad vermək - kiçik görünə bilsə də, vacib addımdır. Fərqli, yaddaqalan və düşünülmüş ad tapmaq istəyirsiniz. Sonra evinizi brendləşdirə və istifadəçi adınızı Instagramda qeydiyyatdan keçirə bilərsiniz.

"Adla bağlı parlaq fikirlər tapmağınıza kömək edəcək bir neçə sual:

• Hansı növ eviniz var? Dağ evidir, ya sahilə yaxın əmlakdır? Tüdor stilində ev və ya loftdur?
• Dizayn temanız var? İnteryerinizdə xüsusi üslub var? Pirat temalıdır? Belə bir tema mövcuddur.
• Mövqe, şəhər və ya qəsəbənizlə əlaqəsi var? Onu sizin adınızla birləşdirmək olar?
• Tarixi əhəmiyyəti var? Bəlkə də mükəmməl ad keçmişdən tapılıb üzə çıxarılmasını gözləyir.

"İnternetdə bəzi araşdırmalar aparın və digər elanların nə etdiyini, sosial mediada hansı adların mövcud olduğunu öyrənin. Biz ilk kabinəmizə ətrafdakı çaylardan biri olan Tay çayının adını ("Tye") verdik. Adın ikinci hissəsi olan "Haus" yaxınlıqda yerləşən Livenvort adlı Bavariya üslublu qəsəbədən ilhamlanaraq seçilib. Bu iki sözü birləşdirib "Tye Haus" adını yaratdıq."

"Adınızı və sosial mediada istifadəçi adlarınızı əldə etdikdən sonra işə gözəl şəkillərlə başlamaq istəyəcəksiniz. Dönə-dönə deyirəm, işə qeyri-peşəkar fotolar toplusu ilə başlamayın. Lentinizdəki təsvirlər insanların görəcəyi ilk şeydir və onların bundan ilham almasını istəyirsiniz. Elanınızdan gəlir gətirəcək amil həmin təsvirlərdir. Fotolarınız aşağıdakı kimi olmalıdır:

• Müntəzəm: Sabit görünüşü və maraq oyandıran ahəngi saxlayın.
• Yüksək keyfiyyətli: Aydın, canlı, yüksək səviyyəli təsvirlər və videolar dərc edin - dənəvərli və ya bulanıq fotolardan yayının.
• Dəqiq: Məzmun əmlakı yaxşı əks etdirməlidir.

"Evinizi fərqləndirən cəhətləri çəkməyə çalışın. Bu interyer, üslub, yoxsa mövqedir? Əmlakınızı həqiqətən də maraqlı edən cəhətləri tapın. Unutmayın ki, təkcə məkanınızı reklam etmirsiniz, həm də ziyarət etdikləri halda insanların əldə edəcəyi təcrübəni - mövqeyiniz, görməli yerlər və regiondakı fəaliyyətləri - paylaşırsınız. Yaxşı foto çəkə bilmirsinizsə, başlamaq üçün peşəkar fotoqraf işə götürmək barədə düşünün."

"Lentiniz üçün gözəl məzmun hazırlamağın başqa yolu influenserlər (məs., fotoqraflar, bloqerlər və videoqraflar) ilə əməkdaşlıq etmək və məzmun müqabilində endirimli qonaqlamalar təklif etməkdir. Regionunuzdakı yerli fotoqraflar, bloqerlər, videoqraflar və məzmun yaradıcılarını araşdırıb onlarla əlaqə saxlamağınızı tövsiyə edirik.

"Bu strategiya səhifəmizə izləyici və klik sayı qazandırmaq üçün əsas vasitələrdən biridir. İnfluenserlər məkanınızdan postlar paylaşarkən yeni istifadəçilər onları görəcək və evinizi kəşf edəcək.

"Dəvət etmək üçün influenserlərlə əlaqə saxlayarkən bunları etmək vacibdir:

• Peşəkar olun. Hazır və bilikli şəkildə işə başlayın. Tərəfdaşlığı irəlilətməyə kömək edəcək düzgün suallar verin.
• Aydın olun. Bu, həqiqətən də "Salam, işinizi bəyənirəm. Airbnb fəaliyyətimə yenicə başlamışam. Yaradıcı mübadilə etmək istəməzdiniz? Məsələn, sizə məxsus təsvirlər və ya məqalə müqabilində qonaqlama təklif edə bilərik." demək qədər asan ola bilər.
• Gözləntilərinizi qeyd edin. Hər iki tərəf üçün qarşılıqlı razılaşma yaradın ki, hər birinizin nə gözlədiyi və nə əldə edəcəyi aydın olsun. Buraya təhvil tarixləri, təsvir hüquqları, etiketləmə, təsvirlərin/videoların sayı və fayl növləri kimi təfərrüatlar daxil olmalıdır.
• Tərəfdaşlığı qarşılıqlı qazanclı edin. Tərəfdaşlığın hər iki tərəf üçün faydalı olduğuna əmin olmaq məqsədilə ona əməkdaşlıq və iş kimi yanaşın.

Digər əlaqədar ipucu heç vaxt boş inventara sahib olmamaqdır. Son dəqiqə açıq tarixləriniz varsa, fasilə vaxtından faydalanın və ondan marketinq səyləriniz üçün istifadə edin. Yerli influenseri qonaqlamağa dəvət edin ki, həmin vaxtdan lentiniz üçün əlavə məzmun yaratmaq məqsədilə istifadə edə biləsiniz.

Onlayn mövcudluğunuzu yaratdıqdan və əla təsvirlərlə dolu lent əldə etdikdən sonra özünüzü tanıtmağın vaxtıdır. Bunu bir sıra müxtəlif yollarla edə bilərsiniz:

• Regionunuzda yerli onlayn səfir olun. Müvafiq onlayn əhatənizi tapın və aktiv iştirakçı olun. Odur ki, "Tye Haus" üçün yerli bizneslərin sosial mediasını və ətrafdakı mövqe etiketlərini izləməyi sevirik. Məsələn, yaxınlıqdakı xizək resortunu izləyirik və digər insanların verdiyi sualları cavablandıra, yaxud da şərh bildirib "Növbəti dəfə qəsəbəyə gəldiyiniz zaman bizdə qalın" deyə bilərik."
• Müsabiqələr və hədiyyə kampaniyaları yaratmaq üçün brendlərlə tərəfdaşlıq edin. İzləyicilərimizin sayını artırmaq üçün müsabiqələr və kampaniyalar da keçiririk. "Brendinizə" uyğun tərəfdaşlıqlar tapmaq üçün geniş perspektivdən düşünün. Auditoriyamızın çarpaz təşviqatını aparmaq üçün ədyal, yataq dəsti və çəngəl-bıçaq şirkəti ilə tərəfdaşlıq edirik. Onlarla əlaqə saxlayıb dedik: "Məhsulunuz haqqında danışmaq üçün bəzi influenserləri cəlb etmək üzrəyik, tərəfdaşlıq etmək istərdiniz? Mən pulsuz qonaqlama əlavə edə bilərəm." Bunlar da e-poçt məlumat bazasına başlamaq üçün əla fürsətlərdir.
  

Bir qayda olaraq, istər internetdə, istərsə də üz-üzə təcrübədə öz-özünü reklam insanlarda mənfi hisslər yaradır - odur ki, bütün qarşılıqlı əlaqələrinizdə təbii olmağınız mühümdür. Sadəcə görünmək üçün hər influenserin postuna eyni mesajla şərh bidirməyin və ya rast gəldiyiniz hər bir hesaba spam göndərməyə başlamayın. Burada incə məqam var və siz israrla satış əldə etməyə çalışdıqda insanlar bunu hiss edə bilir. Dediklərinizdə səmimi olsanız, doğru insanları cəlb edəcəksiniz.

Şəxsi təcrübəmdə həddən artıq həştəq istifadə etməməyə çalışıram. Biz fotoya bir-iki müvafiq yeniliklər lenti etiketləyir və hər posta cəmi 5-10 həştəq daxil edirik. Bəzi insanlar kəşf edilmək üçün çox miqdarda foto etiketləri və həştəqlərdən istifadə edir, mən isə daha incə, təbii yanaşmaya üstülük verirəm.

Unutmayın ki, izləyici toplamaq vaxt tələb edir və şübhəsiz, bir gecədə baş vermir. Bu ipuclarından istifadə etməyinizi, yaradıcı olmağınızı tövsiyə edirəm və şübhəsiz, sosial media icmanızın böyüdüyünü görəcəksiniz. Doluluq göstəriciləriniz sizə minnətdar olacaq.

Xoş ev sahibliyi arzulayırıq!
Tom